westafrika.org

gastSEITE | Salome

salome aus cuenza, 30.01.2003

gaht mir wieder guet, bin bim arzt gsi geschter. han jetzt antibiotika fuer 3 tag, isch jedoch sit dae erscht tablette alles wieder guet. bin froh, isch noed laessig. vaermisse tuen ich eigentlich na einiges. natuerli mini noechschte und s aesse vom mami... brot mit chruschte und rohschinke.... oder mis parfum faehlt mir maengmal au... aber s git nuet wo ich noed da chann chaufe, usser aebe ch schoggi und d maensche... s laebe da isch raecht andersch wie dihei, ich schlafe fascht jede mittag 1-2h, halt siesta... und ich han mich au scho dra gwoehnt, dass alles langsamer gaht wie dihei und alles achli komplizierter isch... mer passt sich aa...

die zugfahrt vo riobamba ueber alausi tuefelsnase und wieder uf alausi gaht 6h stund und mer hockt uf em dach. fuer 1$ chamer chuessi miete, gluecklicherwis... aes isch aes riese aerlaebnis gsi und haet mir uu gfalle, gsehsch teilwis i die inehoef vo dae hueser und d baerge und bues mit tier uf em dach und und und. s ich eifach aes huere gschuettel... und nach 6h hani gnueg gha! ich nimm aa, d familie mit dae chind isch nahaer wieder zrugg uf riobamba, alli wo noed direkt witer reised goend det ane zrugg, aes git bues wo d lueuet abholed in alausi. i dae schuel gahts witerhin zuegig vorwaerts.

han bereits 2 vergangeheite(vo 5!) und 2 zuekunftsforme gha, au befehlsforme und verschiedeni pronomen haemer duregnoh. ohni laerne bisch am falsche ort. d prueefig isch guet gange, han vo 124 puenkt 118 gha. bin meh wie z friede. d schuel isch a 4 schuele in spanie gkopplet und d amis choemed waehred em studium go spanisch laerne und drum isch aes so strikt. so, jetzt gits na oepis z nacht

grueessli us cuenca salome

Salome, 03.02.2003

hoi du, han oisi familie mit bus in cuenca gsichtet!!! vor eme internetcafi... luschig... d reis vo dae rachel und em adrian haet glaub um di 1800 euro gchoscht, pro person natuerli. han daenkt, dir choennt das gfalle, waer ja au na ae gueti moeglichkeit zum mit eme chind reise... hsn d nase grad achli voll, han morn di noechscht prueefig und aes isch enorm schwierig im richtige moment, di richtigi zit azwaende und irgendwie find ichs au gar noed wichtig, d lueuet vaerstoend mich au mit faehler... susst, gang ich vom dunschtig bis am sunntig uf vilcabamba go haenge und go mich erhole. falls aes dich interessiert: izhcayluma.com dini ss demenz isch ganz normal!!! depression chunnt ersch nach dae geburt... maitlinaeme stell ich mir viel eifacher vor zum finde wie buebenaeme!!! bin sicher ihr findet aen passende name... im schlimmschte fall halt woodstock schweizer... muesch na jenes papierkram erledige, damit ich aen schwizer grosscousin ueberchum??

bis noechscht wuche mal!!!
salome

Salome, 04.02.2003

hoi zaeme,
da aen rundbrief vome kollegepaar wo statt dae flueger s schiff gnah haet!!!
waerd ich naechschtmal au mache... waenns oi noed interessiert, eifach loesche!!!
salome

Hier geht's zur Geschichte von Adrian und Rahel

Salome, 11.02.2003
holá chicas y chicos

hoffe, alli sind munter???
han mal wieder aes paeusli brucht vo schuel und stadt und bin mit dae astrid vo einsiedle uf vilcabamba (1700 m.ue.m., 6000 iwohner, durchschnittstemperarur 20 grad, gilt als usstieger mekka). nach aere 5 stuendige horror busfahrt, 3mal fascht aen unfall, eimal aen esel uf dae strass und daenn na nassi und draeckigi strass mit schlaechtem profil... simer in loja acho.
det haemer mir ois ime toyotabuesli di 2 hinderschte und letschte plaetz aergatteret ( haend mir gmeint), doch das buesli haet immer wieder aghalte und lueuet sind ii- aber kei usgstiege... schlussaendlich sind oepe 20 goepfe i das buesli quetscht worde. bin froh gsi, wo ich han choene use nach 1 1/2h. aber s haet sich meh wie glohnt. aes schoens doerfli, rundume saftig grueni baerge und ganz viel blueme und verschiedeni palme und gmschoeckt haets det...

oises hotel isch aen traum gsi, 2km usserhalb, ufere ahoechi, mit chlinem pool, wunderschoenem garte, aes reschti wo offe gsi isch und ae mega ussicht. haet chlini cabañas gha mit 3 zimmer, vaerusse haengemattene.... mir haend gfraesse wie d fuerschte, sogar chaesspaetzli haets geh!!! s bescht isch jedoch s knusprige vollkornbrot gsi... ae massage haend mir ois au goennt, fuer 8$ ae halb stund. haend fuer 2 naecht inkl. zmorge und alles aesse u trinke je 24$ zahlt!!!

vo oisem zimmernachbaer muess ich na brichte! dae marcos, 56i, ami, schwul und alki, haet naebed ois gwohnt. da aer achli einsam gsi isch, haet aer gaern mit ois gret und trunke... waenn mir amig noed mittrunke haend, haet aer sini rumflaesche allei gsoffe... jede tag eini, s haet amig raecht grumplet, waenn dae is bett isch... am samschtig sind mir 4h go rite. haend gmeint, dass seig aes turischtetuerli, sind 7 jungi gsi, 3 aenglaender, 2 duetschi und d asti und ich... aber isch nuet gsi, mir sind galopiert und trabet, ufe und abe, au 2 mal dur aen fluss, han mega schiss gha und nahaer nassi fueess und am schluss haend mir blattere gha vom zuegel hebe und oisi aer.... aber dae usblick uf di ande, eifach himmlisch, unbeschrieblich!!!

haend am sunntig zitig mueesse uf und ois uf d rueckfahrt mache, haend aber vorhaer na aes fruechtebrot gchauft, ime lade vonere welschschwizerin... uuuuuuuuu fein!!! daenked a mich, waenn ihr s naechschtmal ines buerli iebisset! jetzt hani bereits wieder aen tag schuel gha und aes gurkt mich ziemli aa namal 3 wuche d schuelbank drucke, aber ich froi mich riesig uf die zit nahaer. bin am plaen mache , aber weiss nanig, was ich daenn wuerkli mache, evt gangi na in norde vo ecuador z erscht, s haet det na einiges wo mich wuer interessiere... voy a ver!!!

macheds guet, ich daenke a oi, bin jedoch froh, chani na wegbliebe bis dae schnee au weg isch... unos abrazos salome


www.westafrika.org | david@westafrika.org
© david scharler